اڱارو, 20 آگسٽ 2019 - Tue 08 20 2019

منو

نهج البلاغه خطبو 130: الله تعاليٰ جي حمد

هو جيڪي ڪجھ وٺي ۽ جيڪي ڪجھ ڏي، ۽ جيڪي نعمتون بخشي، ۽ جن آزمائشن ۾ وجهي، (سڀني تي) اسين سندس حمد ۽ تعريف ڪريون ٿا. هو هر لڪل ڳالھ جي گهراين کان آگاھ ۽ هر لڪل شي تي حاضر ۽ ناظر آهي. هو سينن ۾ لڪل ڳالهين ۽ اکين جي لڪل ڳجهن اشارن جي ڄاڻڻ وارو آهي. اسين گواهي ڏيون ٿا، ته ان کان سواءِ ڪو به معبود نه آهي، ۽ محمد صلي الله عليه و آله وسلم جن سندس برگزيده (بندا) ۽ موڪليل رسول آهن. اهڙي شاهدي، جنهن ۾ ظاهر ۽ باطن هڪجهڙا ۽ دل ۽ زبان همنوا آهن.

هن خطبي جو هڪ حصو هي به آهي:

خدا جو قسم! ته اها ڳالھ، جيڪي سراسر حقيقت آهي، سا کل چرچو نه آهي، ۽ سراسر حق آهي، ڪوڙ نه آهي، سو فقط موت آهي. هن جي سڏڻ واري پنهنجو آواز پهچائي ڇڏيو آهي، ۽ هن جي هڪلڻ واري جلدي مچائي رکي آهي. هي (جيئرن) ماڻهن جي ڪثرت توهان جي نفس کي ڌوڪو نه ڏي (جو پنهنجي موت کي وساري ويهو)، توهان انهن ماڻهن کي، جيڪي توهان کان اڳ ۾ هئا، جن مال ۽ دولت کي گڏ ڪيو هو، جيڪي غربت کان ڊڄندا هئا ۽ اميدن جي درازي ۽ موت جي دوري جو (فريب کائي) نتيجن کان بيخوف بنجي چڪا هئا. پوءِ توهان ڏٺو، ته موت ڪهڙي طرح انهن تي اچي ڪڙڪيو، جو انهن کي وطن مان ڪڍي ٻاهر ڪيائين، ۽ کين امن واري جاءِ مان پنهنجي گرفت ۾ ورتئين. اهڙي حالت ۾ جو هو تابوت تي لڏايل هئا، ۽ ڪانڌي هڪٻئي جي پٺيان کين ڪلهو ڏئي رهيا هئا، ۽ پنهنجي آڱرين (جي سهاري) سان روڪيل هئا. ڇا توهان انهن ماڻهن کي نه ڏٺو، جيڪي پري جون اميدون لڳايو ويٺا هئا. جن مضبوط محل بنايا هئا ۽ دنيا جا مال گڏ ڪيائون؟ ڪهڙي طرح نه انهن جا گهر قبرن ۾ بدلجي ويا، ۽ گڏ ڪيل مال ۽ دولت تباھ ٿي وئي، ۽ انهن جو مال وارثن جو ٿيو، ۽ انهن جون زالون ٻين وٽ پهچي ويون؟ (هاڻي) نه اهي نيڪين ۾ اضافو ڪري سگهن ٿا ۽ نه وري انهن کي ڪو موقعو آهي، جو اهي ڪنهن گناھ ڪرڻ کان پوءِ (توبھ ڪري) الله جون رضامنديون حاصل ڪن.

جنهن شخص پنهنجي دل کي تقوى (پرهيزگاري) جو عادي بنايو، سو نيڪين ۾ اڳرائي ڪري ويو، ۽ سندس ڪيو ڪريو سجايو ٿيو. تقوى حاصل ڪرڻ جو موقعو غنيمت ڄاڻو ۽ جنت لاءِ جيڪو به عمل هئڻ گهرجي، سو پورو ڪريو، ڇو ته دنيا توهان جي رهڻ جي جڳھ نه بڻائي وئي آهي، بلڪ هي ته توهان جي لاءِ گذرگاھ (وڃڻ وارو رستو) آهي، ته جيئن توهان ان ۾ پنهنجي مستقل قيام گاھ لاءِ ثمر (رستي جو خرچ) گڏ ڪري سگهو. هن دنيا مان هلي نڪرڻ لاءِ تيار رهو ۽ ڪوچ ڪرڻ لاءِ سواريون پنهنجي قريب ڪريو (ته وقت اچڻ تي آساني سان سوار ٿي سگهو).

Leave your comments

0
terms and condition.
  • No comments found